車軨車呔護理 5 大法寶

以往嘅車軨只限於噴漆、電鍍、鋁合金等物料，現今嘅車軨製造商不斷研發同利用唔同物料製造出唔同種類嘅車軨，例如三層鍛造、原廠銀色合金、電鍍等，相應嘅清潔劑、護理用品亦因此誕生。

市面上嘅車軨車呔護理用品用法簡易，價錢亦相對平，好適合車主親自落手！

車軨護理

車軨最難清莫過於軨上嘅迫力粉，因正負極關係，迫力粉會緊緊咬實金屬物料，而且大力係抹唔甩，只會磨花車軨，更唔應該用強鹼度嘅清潔劑清洗，否則會令車軨變得無光澤或變色。

只要用洗軨水，就可以將迫力粉扣緊住嘅正負極打散，噴完後再過水一抹即時立立令，輕鬆清除迫力粉。市面大部份洗軨水適用於各種金屬呔軨包括合金及電鍍呔軨，軟化乾涸嘅迫力粉同所有頑固污漬。

好多車主務求將成部車都整到閃令令，除左車漆光亮度，亦會注重埋車軨嘅光澤，車主們可以用金屬拋光劑，為呔軨金屬表面進行拋光，回復鏡面般光澤，提高光澤度，另外部分拋光劑有附加防銹保護功能，反光效果更持久。

勤洗輪呔唔單止可以延長使用壽命，同時可以令輪呔性能充分發揮，維持良好嘅抓地能力，好多輪呔清潔劑係以噴劑形式，只要簡單噴一噴就起到清潔功效，非常方便，對頑固嘅塵土能輕易清理。

輪呔喺暴雨及水浸下，容易老化及變得啞啡色，輪呔保護液可以令輪呔回復原來色澤，保持光亮黑潤，預防老化，防止褪色、枯乾及龜裂。

氣壓對輪胎嘅抓地力及磨蝕程度有好大關係。

當胎氣過多，會令胎面脹起，經過一段時間，胎面中間嘅磨蝕程度會比左右兩邊大；相反，胎氣長期不足，就會令胎面兩邊蝕得更快。

兩種情況都會影響抓地力，以及輪胎嘅耐用性。最好都係按照車門邊下方嘅胎氣指引，打入合適磅數，仲要每隔兩、三個星期Check一次胎氣，咁就安全得多。