濃濃咖啡冬日飲
冬日整返杯濃濃特飲，提提神之餘，仲 Sweet 到入心啊 <3
非酒精玩法
將好味素材恰當地融合落咖啡之中，達致全新咖啡豐盈體驗。
蛋奶酒拿鐵
雖然蛋奶酒 (eggnog) 中文係有個「酒」字，但實際上佢係由牛奶，雞蛋，奶油，糖，肉桂等香料製成，不含酒精，配搭咖啡仲可以帶來「英倫口味」，預備同等份量蛋奶酒同黑咖啡，每半杯蛋奶酒放入微波爐加熱30秒，就可以將咖啡昇華到另一層次。
巧克力咖啡
黑巧克力同白巧克力各有獨特甜味，亦可以同咖啡相得益彰。將 1-2 湯匙巧克力糖漿 / 巧克力粉加入一杯黑咖啡即可飲用，揀啱一隻薄荷巧克力，再用聖誕「士的」加以裝飾，令到特飲更加有聖誕風情。
小心要注意，可可粉單獨放落咖啡，未必可以完全溶解，導致飲落有一粒粒口感，想驅除顆粒感，可以先用少量溫水溶解可可粉同砂糖，再加到咖啡入面。
咖啡 Cocktail 方程式
有啲咖啡面世超過一個世紀，依然係唔少人嘅至愛，正正就係因為唔同素材同咖啡嘅完美結合，帶嚟一試難忘嘅奇幻味覺體驗。
愛爾蘭咖啡
除咗咖啡，就只有3種材料。加入2湯匙白糖，再加 2 湯匙波本酒 或 威士忌到 3/4 杯咖啡中，最後加 1-2湯匙鮮奶油 (30-36% 脂肪) 加以點綴，炮製出地道北歐風味。
西班牙咖啡
加入 2 湯匙甘露咖啡甜酒，2湯匙 Triple Sec 香橙冧酒，令咖啡口味更加強烈。此款就係五月五日節 (Cinco de Mayo) 人人狂歡嘅拉丁特飲。
咖啡的千變萬化
咖啡特飲同雞尾酒嘅配對無處不在，由 1 湯匙到整整 1 杯咖啡同酒相互結合，都可以產出唔同特色。將你中意嘅口味做唔同實驗，搵到完美比例，推介比你身邊嘅人啦！
風味咖啡
就係用唔同口味嘅烈酒，創造自己最愛嘅咖啡風味。例如榛果口味可以用到意大利嘅 Frangelico 杏仁口味可以用到同係意大利嘅 Amaretto 又或者用每公升有 400g 糖嘅利口酒 (Creme de cassis)，調製出黑加侖子風味。
咖啡烈酒
咖啡嘅烘焙風味，係可以帶出波本酒、白蘭地、愛爾蘭威士忌、冧酒更深層次嘅味道。加 2 湯匙烘焙咖啡落你最愛嘅雞尾酒或者烈酒，或者會為你帶嚟意想不到嘅驚喜。
